dard kaa phir maza hai jab 'akhtar' — Aleem Akhtar Muzaffarnagri

mujhe aankhein dikhaaegi bhalaa kyaa gardish-e-dauraan
miri nazron ne dekhaa hai tiraa naa-mehrbaan honaa

dard baDh kar davaa na ho jaae
zindagi be-mazaa na ho jaae

ye aur baat ki iqraar kar sakein na kabhi
miri vafaa kaa magar un ko e'tibaar to hai

hamein duniyaa mein apne gham se matlab
zamaane ki khushi se vaastaa kyaa

vo ta'alluq hai tire gham se ki allaah allaah
ham ko haasil ho khushi bhi to gavaaraa na karein

mujhe to kal bhi na thaa un par ikhtiyaar koi
aur un ko mujh pe vahi ikhtiyaar aaj bhi hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ranj-o-gham aur alam-o-dard kaa lashkar nikle
ishq to tab hai jab aankhon se samandar nikle

bhigi miTTi ki mahak pyaas baDhaa deti hai
dard barsaat ki bundon mein basaa kartaa hai

khuub jiine kaa mazaa paate hain ham
khun-e-dil piite hain gham khaate hain ham