bhiig jaane par bhi jo bujhtaa na thaa — Amar Singh Figar

bhule se aa gayaa huun farishton ke des mein
kis se pata karun ki yahaan fard kaun hai

har khushi dil se kyuun lagaa baiThein
kis mein gham ho pata nahin hotaa

machalti shokh maujon ko main apne naam kyuun likkhun
ki aakhir khushk hogaa mausam-e-barsaat kaa dariyaa

tu ye na puchh mire gaanv mein hain ghar kitne
ye puchh kaun se ghar mein azaab kitne hain

josh-e-takmil-e-tamannaa hai khudaa khair kare
khaak hone kaa andesha hai khudaa khair kare

phuul to kyaa khaar bhi manzur hain
be-rukhi se yuun magar pheinko nahin

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

jaane kitnaa vaqt lagegaa khud se baahar aane mein
tanhaai kaa shor bahut hai shahron ke viraane mein