shaayad nikal hi aae koi chaaragar 'figaar' — Amar Singh Figar

bhule se aa gayaa huun farishton ke des mein
kis se pata karun ki yahaan fard kaun hai

har khushi dil se kyuun lagaa baiThein
kis mein gham ho pata nahin hotaa

bhiig jaane par bhi jo bujhtaa na thaa
aaj vo shoala dhuaan hone ko hai

machalti shokh maujon ko main apne naam kyuun likkhun
ki aakhir khushk hogaa mausam-e-barsaat kaa dariyaa

tu ye na puchh mire gaanv mein hain ghar kitne
ye puchh kaun se ghar mein azaab kitne hain

josh-e-takmil-e-tamannaa hai khudaa khair kare
khaak hone kaa andesha hai khudaa khair kare

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

main bhi tanhaa is taraf huun vo bhi tanhaa us taraf
main pareshaan huun to huun vo bhi pareshaani mein hai

tum kyon udaas ho gae maidaan-e-hashr mein
kah do to dil ki dil mein miri daastaan rahe

shaayad tumhaari yaad mire paas aa gai
yaa hai mire hi dil ki sadaa sochnaa paDaa