ruuh se lipTe dard ke manzar — Ameer Nehtauri

vaqaar-e-shauq se gir kar bhi vaar mat karnaa
mile jo zakhmi parinda shikaar mat karnaa

dil ke zakhmon ko sajaane kaa hunar rakhtaa huun
mustaqil main tiri yaadon kaa safar rakhtaa huun

dard ne li angDaai aisi
zakhm kaa ik ik Taankaa TuuTaa

ham apne zakhmon pe rakh lein namak zaruri hai
dayaar-e-ishq mein un ki mahak zaruri hai

hogi na chaaraagar tiri tadbir kaargar
ham ko khud apne zakhmon ki chaahat hai aaj-kal

furqat ki shab khaamoshiyaan zakhmon ki phir angDaaiyaan
aankhein jab apni nam huiin bechaargi achchhi lagi

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

kisi ke saath ki koi zarurat ab nahin hoti
tumhaari yaad ke mausam sadaa aabaad rahte hain

zindagi gul hai naghma hai mahtaab hai
zindagi ko faqat imtihaan mat samajh

dil dukhaanaa miraa nahin maqsad
haq-bayaani miri nahin jaati