jis husn ki hai chashm-e-tamannaa ko justuju — Asar Sahbai

tumhaari yaad mein duniyaa ko huun bhulaae hue
tumhaare dard ko siine se huun lagaae hue

ye husn-e-dil-fareb ye aalam shabaab kaa
goyaa chhalak rahaa hai piyaala sharaab kaa

tere shabaab ne kiyaa mujh ko junun se aashnaa
mere junun ne bhar diye rang tiri shabaab mein

ilaahi kashti-e-dil bah rahi hai kis samundar mein
nikal aati hain maujein ham jise saahil samajhte hain

saari duniyaa se be-niyaazi hai
vaah ai mast-e-naaz kyaa kahnaa

aah kyaa kyaa aarzuein nazr-e-hirmaan ho gaiin
roiye kis kis ko aur kis kis kaa maatam kijiye

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

pyaaso raho na dasht mein baarish ke muntazir
maaro zamin pe paanv ki paani nikal paDe