dev pari ke qisse sun kar — Ateeq Allahabadi

'atiq' bujhtaa bhi kaise charaagh-e-dil meraa
lagi thi us ki hifaazat mein saari raat havaa

honTon par ik baar sajaa kar apne honT
us ke baad na baatein karnaa so jaanaa

navaaztaa thaa hamesha vo gham ki daulat se
aur is khazaane se main maalaa maal ho hi gayaa

ghar hamaaraa phunk kar kal ik paDosi ai 'atiq'
do ghaDi to hans liyaa phir baad mein royaa bahut

main ne puchhaa ye bataa mujh se bichhaDne kaa tujhe
kuchh qalaq hotaa hai kyaa us ne kahaa thoDaa bahut

main baDaa ho gayaa huun magar bachpanaa
mere dil se kabhi bhi gayaa hi nahin

umr hi teri guzar jaaegi un ke hal mein
teraa bachcha jo savaalaat liye baiThaa hai

aTaa hai shahar baarudi dhuein se
saDak par chand bachche ro rahe hain

baahar insaanon se nafrat hai lekin
ghar mein Dheron bachche paidaa karte hain

bach jaae javaani mein jo duniyaa ki havaa se
hotaa hai farishta koi insaan nahin hotaa

mire bachche tiraa bachpan to main ne bech Daalaa
buzurgi oDh kar kaandhe tire kham ho gae hain