kisi ke jaal mein aa kar main apnaa dil ganvaa baiThaa — Babar Rehman Shah

ai pari-zaad tere jaane par
ho gayaa khud se raabta meraa

thakan se chuur hai saaraa vajud ab meraa
main bojh itne ghamon kaa to Dho nahin saktaa

aatish-e-ishq jab jalaati hai
jal ke main nosh-e-jaam kartaa huun

dil ne ham se ajab hi kaam liyaa
ham ko bechaa magar na daam liyaa

muflisi ne jaa-ba-jaa luuTaa hamein
ab bachaa kuchh bhi nahin luTvaaein kyaa

dil se aakhir charaagh-e-vasl bujhaa
kyaa tamannaa ne intiqaam liyaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

divaar hai duniyaa ise raahon se haTaa de
har rasm-e-mohabbat ko miTaane ke liye aa

jaane kis kis kaa galaa kaTtaa pas-e-parda-e-ishq
khul gae meri shahaadat mein sitamgar kitne

di us ne mujh ko jurm-e-mohabbat ki vo sazaa
kuchh be-qusur log sazaa maangne lage

ye pyaar kaa jazba tire kuchh kaam to aae
meraa nahin bantaa hai to ban aur kisi kaa