aatish-e-ishq jab jalaati hai — Babar Rehman Shah

kisi ke jaal mein aa kar main apnaa dil ganvaa baiThaa
mujhe thaa ishq qaatil se main apnaa sar kaTaa baiThaa

ai pari-zaad tere jaane par
ho gayaa khud se raabta meraa

thakan se chuur hai saaraa vajud ab meraa
main bojh itne ghamon kaa to Dho nahin saktaa

dil ne ham se ajab hi kaam liyaa
ham ko bechaa magar na daam liyaa

muflisi ne jaa-ba-jaa luuTaa hamein
ab bachaa kuchh bhi nahin luTvaaein kyaa

dil se aakhir charaagh-e-vasl bujhaa
kyaa tamannaa ne intiqaam liyaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ye raah-e-ishq hai aakhir koi mazaaq nahin
saubaton se jo ghabraa gae hon ghar jaaein

aaghaaz-e-mohabbat se anjaam-e-mohabbat tak
guzraa hai jo kuchh ham par tum ne bhi sunaa hogaa

asar-e-ishq se huun surat-e-shama khaamosh
ye muraqqaa hai miri hasrat-e-goyaai kaa

tiri giraft miraa martaba baDhaati hai
mujhe tu apni mohabbat mein mubtalaa rakhnaa