apni khu-e-vafaa se Dartaa huun — Bekhud Badayuni

shikva sun kar jo mizaaj-e-but-e-bad-khu badlaa
ham ne bhi saath hi taqrir kaa pahlu badlaa

khuun ho jaaein khaak mein mil jaaein
hazrat-e-dil se kuchh baiid nahin

vo un kaa vasl mein ye kah ke muskuraa denaa
tulu-e-subh se pahle hamein jagaa denaa

vo jo kar rahe hain bajaa kar rahe hain
ye jo ho rahaa hai bajaa ho rahaa hai

shifaa kyaa ho nahin sakti hamein lekin nahin hoti
davaa kyaa kar nahin sakte hain ham lekin nahin karte

gardish-e-bakht se baDhti hi chali jaati hain
miri dil-bastagiyaan zulf-e-girah-gir ke saath

husn jalva dikhaa gayaa apnaa
ishq baiThaa rahaa udaas kahin

ham ko mili hai ishq se ik aah-e-soz-naak
vo bhi usi ki garmi-e-baazaar ke liye

mohkme mein ishq ke hai yaaro divaane kaa shor
mere dil dene kaa ghul us ke mukar jaane kaa shor

hijaabaana aa kar vo chalte bane
mujhe 'ishq kaa vasvasa rah gayaa

huun khafaa saare zamaane se faqat tere liye
'ishq ki tauhid mere tu kabhi to jaanegaa

aarzu ik 'ishq ki laai 'adam se dahr tak
kaifiyat ye paane ko piitaa hai aadam zahr tak