jis pari par mar miTe the vo pari-zaadi na thi — Faizan Hashmi

bahut qadim nahin kal kaa vaaqia hai ye
main is zamin pe utraa thaa teri zaat ke saath

khalaa mein girvi rakkhaa apne saare khvaabon ko
aur is zamin pe chhoTaa saa ghar liyaa main ne

teri hi sair ke liye aataa rahungaa baar baar
teraa thaa saat din kaa shauq meri hai umr bhar ki sair

bas yahi soch ke rahtaa huun main zinda is mein
ye mohabbat hai koi mar nahin saktaa is mein

main apni khushiyaan akele manaayaa kartaa huun
yahi vo gham hai jo tujh se chhupaa huaa hai miraa

vo kyaa khushi thi jo dil mein bahaal rahti thi
magar vajh nahin banti thi muskuraane ki

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

ghurur bhi jo karun main to aajizi ho jaae
khudi mein lutf vo aae ki be-khudi ho jaae