qaid-e-gham-e-hayaat bhi kyaa chiiz hai 'fanaa' — Fana Nizami Kanpuri

gham se naazuk zabt-e-gham ki baat hai
ye bhi dariyaa hai magar Thahraa huaa

vo aankh kyaa jo aariz o rukh par Thahar na jaae
vo jalva kyaa jo diida o dil mein utar na jaae

mujhe rutba-e-gham bataanaa paDegaa
agar mere pichhe zamaana paDegaa

tire vaadon pe kahaan tak miraa dil fareb khaae
koi aisaa kar bahaana miri aas TuuT jaae

ik tujh ko dekhne ke liye bazm mein mujhe
auron ki samt maslahatan dekhnaa paDaa

koi paaband-e-mohabbat hi bataa saktaa hai
ek divaane kaa zanjir se rishta kyaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

honaa paDaa hai khugar-e-gham bhi khushi ki khair
vo mujh pe mehrbaan hain magar be-rukhi ke saath

thi siyaahiyon kaa maskan miri zindagi ki vaadi
tire husn ke tasadduq mujhe raushni dikhaa di

mujhe na Dar hai qayaamat kaa ab na khauf-e-ajal
main dard-e-tark-e-mulaaqaat sah ke aaya huun