raushni mein apni shakhsiyat pe jab bhi sochnaa — Himayat Ali Shayar

zindagi ki baat sun kar kyaa kahein
ik tamannaa thi taqaazaa ban gai

suraj ko ye gham hai ki samundar bhi hai paayaab
yaa rab mire qulzum mein koi sail-e-ravaan aur

har taraf ik muhib sannaaTaa
dil dhaDaktaa to hai magar khaamosh

tujh se vafaa na ki to kisi se vafaa na ki
kis tarah intiqaam liyaa apne aap se

taariki mein lipTi hui pur-haul khamoshi
is aalam mein kyaa nahin mumkin jaagte rahnaa

main sochtaa huun is liye shaayad main zinda huun
mumkin hai ye gumaan haqiqat kaa gyaan de

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

hain dalilein tire khilaaf magar
sochtaa huun tiri himaayat mein

raahbar rahzan na ban jaae kahin is soch mein
chup khaDaa huun bhuul kar raste mein manzil kaa pataa

main dastaras se tumhaari nikal bhi saktaa huun
ye soch lo ki main rasta badal bhi saktaa huun

lagaae piiTh baiThi sochti rahti thi main jis se
vahi divaar lafzon ki achaanak aa rahi mujh par