agarche ishq mein aafat hai aur balaa bhi hai — Inamullah Khan Yaqeen

is ashk o aah mein saudaa bigaD na jaae kahin
ye dil kuchh aab-rasida hai kuchh jalaa bhi hai

chashm-e-tar par gar nahin kartaa havaa par rahm kar
de le saaqi ham ko mai ye abr-e-baaraan phir kahaan

kyaa badan hogaa ki jis ke kholte jaame kaa band
barg-e-gul ki tarah har naakhun moattar ho gayaa

misr mein husn ki vo garmi-e-baazaar kahaan
jins to hai pe zulekhaa saa kharidaar kahaan

umr fariyaad mein barbaad gai kuchh na huaa
naala mashhur ghalat hai ki asar kartaa hai

khalvat ho aur sharaab ho maashuq saamne
zaahid tujhe qasam hai jo tu ho to kyaa kare

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

ai chaaragaro paas tumhaare na milegi
bimaar-e-mohabbat ki davaa aur hi kuchh hai

tu jo talvaar se nahlaae lahu mein mujh ko
ghusl-e-sehhat huaa bhi ishq ki bimaari se

ishq binaai baDhaa detaa hai
jaane kyaa kyaa nazar aataa hai mujhe