musalsal jaagne ke baa'd khvaahish ruuTh jaati hai — Iqbal Sajid

suraj huun chamakne kaa bhi haq chaahiye mujh ko
main kohr mein lipTaa huun shafaq chaahiye mujh ko

vo chaand hai to aks bhi paani mein aaegaa
kirdaar khud ubhar ke kahaani mein aaegaa

apni anaa ki aaj bhi taskin ham ne ki
ji bhar ke us ke husn ki tauhin ham ne ki

pyaaso raho na dasht mein baarish ke muntazir
maaro zamin pe paanv ki paani nikal paDe

ab tu darvaaze se apne naam ki takhti utaar
lafz nange ho gae shohrat bhi gaali ho gai

suraj huun zindagi ki ramaq chhoD jaaungaa
main Duub bhi gayaa to shafaq chhoD jaaungaa

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

khul gayaa un ki aarzu mein ye raaz
ziist apni nahin paraai hai

aankhein khulin to jaag uThin hasratein tamaam
us ko bhi kho diyaa jise paayaa thaa khvaab mein

dil ki hasrat na rahi dil mein mire kuchh baaqi
ek hi tegh lagaa aisi ai jallaad ki bas

kab pilaavegaa tu ai saaqi mujhe jaam-e-sharaab
jaan-ba-lab huun aarzu mein mai ki paimaane ki tarah

majnun hain magar khvaahish-e-lailaa nahin karte
ham ishq to karte hain tamannaa nahin karte