ye kis maqaam pe laai hai zindagi ham ko — Hafeez Banarasi

us se baDh kar kiyaa milegaa aur inaam-e-junun
ab to vo bhi kah rahe hain apnaa divaana mujhe

sabhi ke diip sundar hain hamaare kyaa tumhaare kyaa
ujaalaa har taraf hai is kinaare us kinaare kyaa

kuchh is ke sanvar jaane ki tadbir nahin hai
duniyaa hai tiri zulf-e-girah-gir nahin hai

dushmanon ki jafaa kaa khauf nahin
doston ki vafaa se Darte hain

tadbir ke dast-e-rangin se taqdir darakhshaan hoti hai
qudrat bhi madad farmaati hai jab koshish-e-insaan hoti hai

vo baat 'hafiz' ab nahin milti kisi shai mein
jalvon mein kami hai ki nigaahon mein kami hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

aansu nikal ke aankh se palkon pe ruk gae
ghar chhoDne ke vaqt ThiThakte hain paanv bhi

tanhaai ki ye kaun si manzil hai rafiqo
taa-hadd-e-nazar ek bayaabaan saa kyuun hai

shab ki tanhaaiyon mein yaad us ki
jhilmilaataa huaa diyaa jaise