husn ye hai ki dilrubaa ho tum — Jaleel Manikpuri

aaj hai vo bahaar kaa mausam
phuul toDun to haath jaam aae

pyaari surat vo haae kyaa hogi
jis ko be-dekhe pyaar aataa hai

sote mein vo jo mujh se ham-aaghosh ho gae
jitne gile the khvaab-e-faraamosh ho gae

tazkira soz-e-mohabbat kaa kiyaa thaa ik baar
taa-dam-e-marg zabaan se miri chhaale na gae

mohabbat ek taraf se mazaa nahin deti
kuchh iztiraab tujhe ho kuchh iztiraab mujhe

jo tire ishq mein tabaah huaa
koi us ko tabaah kar na sakaa

dil-o-nazar ko abhi tak vo de rahe hain fareb
tasavvuraat-e-kuhan ke qadim but-khaane

ye husn-e-dil-fareb ye aalam shabaab kaa
goyaa chhalak rahaa hai piyaala sharaab kaa

mujhe malaal nahin teri bevafaai kaa
main apne aap se aankhein nahin milaa saktaa

ghalat-ravi ko tiri main ghalat samajhtaa huun
ye bevafaai bhi shaamil miri vafaa mein hai

vo baat mujh ko to dushnaam si lagi hai 'atiq'
tumhaaraa naam likhaa kis ne be-vafaaon mein

ghair ne tum ko jaan kahaa samjhe bhi kuchh ki kyaa kahaa
yaani ki bevafaa kahaa jaan kaa e'tibaar kyaa