zinda rahne ke liye asbaab de — Javed Naseemi

dar-ba-dar ho gae taabir ki dhun mein kitne
in hasin khvaabon se baDh kar koi saffaak nahin

ek chehra hai jo aankhon mein basaa rahtaa hai
ik tasavvur hai jo tanhaa nahin hone detaa

jise na aane ki qasmein main de ke aayaa huun
usi ke qadmon ki aahaT kaa intizaar bhi hai

muddat hui ki zinda huun dekhe baghair use
vo shakhs mere dil se utar to nahin gayaa

zaraa qarib se dekhun to koi raaz khule
yahaan to har koi lagtaa hai aadmi jaisaa

chaand kaa qurb lagaa kaisaa chalo puchh aaein
aasmaanon ke safar se vo palaT aayaa hai

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

sote mein vo jo mujh se ham-aaghosh ho gae
jitne gile the khvaab-e-faraamosh ho gae

ai subh main ab kahaan rahaa huun
khvaabon hi mein sarf ho chukaa huun