kaun guzraa hai ye aandhiyon ki tarah — Khan Rizwan

tark-e-taalluqaat mein mahjur to hue
lekin khayaal-o-khvaab mein vo ru-ba-ru rahe

ye khadd-o-khaal ye gesu ye surat-e-zebaa
sabhi kaa husn hai apni jagah magar aankhein

ham to apne qad ke baraabar bhi na hue
log na jaane kaise khudaa ho jaate hain

umr-e-rafta jaa kisi divaar ke saae mein baiTh
be-sabab ki khvaahishein hain aur ghar ki justuju

ki hai sargoshi sar-e-shaam mire dil ne phir
is liye ham ne lapeTaa nahin bistar apnaa

vo chaahtaa hai ki ham us ki dastaras mein rahein
kisi kaa ho ke rahein ye use gavaaraa nahin

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

kitnaa dushvaar lag rahaa thaa safar
dekho ham aa gae vahaan se yahaan

ajiib khauf kaa aalam hai apne chaaron taraf
safar mein lagtaa hai ye aakhiri safar to nahin