vo chaahtaa hai ki ham us ki dastaras mein rahein — Khan Rizwan

tark-e-taalluqaat mein mahjur to hue
lekin khayaal-o-khvaab mein vo ru-ba-ru rahe

ye khadd-o-khaal ye gesu ye surat-e-zebaa
sabhi kaa husn hai apni jagah magar aankhein

ham to apne qad ke baraabar bhi na hue
log na jaane kaise khudaa ho jaate hain

umr-e-rafta jaa kisi divaar ke saae mein baiTh
be-sabab ki khvaahishein hain aur ghar ki justuju

kaun guzraa hai ye aandhiyon ki tarah
shama-e-raah-e-vafaa ko bujhaate hue

ki hai sargoshi sar-e-shaam mire dil ne phir
is liye ham ne lapeTaa nahin bistar apnaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

mere alaava use khud se bhi mohabbat hai
aur aisaa karne se vo bevafaa nahin hoti

itnaa hi chaahtaa huun ki main aur andalib
aapas mein dard-e-dil kahein Tuk baiTh kar kahin

ulfat mein tiri ai but-e-be-mehr-o-mohabbat
aayaa hamein ik haath se taali kaa bajaanaa