zaraa Thahro ki paDh luun kyaa likhaa mausam ki baarish ne — Majeed Akhtar

saaraa hisaab-e-jaan-o-dil rakkhaa hai tere saamne
chaahe to de amaan mujhe chaahe to darguzar na kar

raat bhi chaand bhi samundar bhi
mil gae kitne gham-gusaar mujhe

karam ke baab mein apnon se ibtidaa kiyaa kar
zaraa si baat pe dil ko na yuun buraa kiyaa kar

pyaaso raho na dasht mein baarish ke muntazir
maaro zamin pe paanv ki paani nikal paDe

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

aae kuchh abr kuchh sharaab aae
is ke baa'd aae jo azaab aae

gul to gul khaar pe dekhi jo kabhi garm shu'aa'
chhaa gae baagh pe ham abr-e-bahaaraan ho kar

sataayaa aaj munaasib jagah pe baarish ne
isi bahaane Thahar jaaein us kaa ghar hai yahaan

nafas nafas pe yahaan rahmaton ki baarish hai
hai bad-nasib jise zindagi na raas aai