ehsaas-e-tirgi thaa use raushni ke baad — Nawab Ahsan

bikhre hue khvaabon ki vo tasvir hai shaayad
ab ye bhi nahin yaad kahaan us se milaa thaa

khauf-o-dahshat se lab nahin khulte
varna qaatil miri nigaah mein hai

jab bhi lauTaa gaanv ke baazaar se
mujh ko sab bachchon ne dekhaa pyaar se

shab-e-firaaq ki tanhaaiyon mein teraa khayaal
mire vajud se kartaa rahaa judaa mujh ko

us ne to chhinaa thaa mere jism se meraa libaas
jab pahan kar us ne dekhaa to qabaa Dhili mili

Dar hai kahin main dasht ki jaanib nikal na jaaun
baiThaa huun apne paanv mein zanjir Daal kar

raah mein un se mulaaqaat ho gai
jis se Darte the vahi baat ho gai

zindagi ik imtihaan hai imtihaan kaa Dar nahin
ham andheron se guzar kar raushni kahlaaeinge

ye dil-fareb charaaghaan ye qahqahon ke hujum
main Dar rahaa huun ab is shahar se guzarte hue

jab ye maanaa ki dil mein Dar hai bahut
tab kahin jaa ke dil se Dar niklaa

shauq hai tujh ko zamaane mein tiraa naam rahe
aur mujhe Dar hai mohabbat miri bad-naam na ho