andheraa maangne aayaa thaa raushni ki bhiik — Nazeer Banarasi

bad-gumaani ko baDhaa kar tum ne ye kyaa kar diyaa
khud bhi tanhaa ho gae mujh ko bhi tanhaa kar diyaa

ye inaayatein ghazab ki ye balaa ki mehrbaani
miri khairiyat bhi puchhi kisi aur ki zabaani

vo aaina huun jo kabhi kamre mein sajaa thaa
ab gir ke jo TuuTaa huun to raste mein paDaa huun

dusron se kab talak ham pyaas kaa shikva karein
laao tesha ek dariyaa dusraa paidaa karein

raasta roke hue kab se khaDi hai duniyaa
na idhar hoti hai zaalim na udhar hoti hai

umr bhar ki baat bigDi ik zaraa si baat mein
ek lamha zindagi bhar ki kamaai khaa gayaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa