ham apni jaan ke dushman ko apni jaan kahte hain — Rahat Indori

main aa kar dushmanon mein bas gayaa huun
yahaan hamdard hain do-chaar mere

ik mulaaqaat kaa jaadu ki utartaa hi nahin
tiri khushbu miri chaadar se nahin jaati hai

hamaare piir 'taqi-mir' ne kahaa thaa kabhi
miyaan ye 'aashiqi 'izzat bigaaD deti hai

aankh mein paani rakho honTon pe chingaari rakho
zinda rahnaa hai to tarkibein bahut saari rakho

ye zaruri hai ki aankhon kaa bharam qaaem rahe
niind rakkho yaa na rakkho khvaab meyaari rakho

botalein khol kar to pi barson
aaj dil khol kar bhi pi jaae

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

ho na paae jab mukammal ishq kaa qissa to phir
shohratein rahne do ab gum-naamiyaan hi Thiik hain

tum miraa naam-o-nasab puchh rahe ho sab se
ishq ho jaae to shajara nahin dekhaa jaataa

jo chaahte ho so kahte ho chup rahne ki lazzat kyaa jaano
ye raaz-e-mohabbat hai pyaare tum raaz-e-mohabbat kyaa jaano