abhi se shikva-e-past-o-buland ham-safro — Rais Amrohvi

aadmi ki talaash mein hai khudaa
aadmi ko khudaa nahin miltaa

apne ko talaash kar rahaa huun
apni hi talab se Dar rahaa huun

sirf taarikh ki raftaar badal jaaegi
nai taarikh ke vaaris yahi insaan honge

ham apne haal-e-pareshaan pe baarhaa roe
aur us ke baa'd hansi ham ko baarhaa aai

khaamosh zindagi jo basar kar rahe hain ham
gahre samundaron mein safar kar rahe hain ham

sadiyon tak ehtimaam-e-shab-e-hijr mein rahe
sadiyon se intizaar-e-sahar kar rahe hain ham

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

musaafiraan-e-rah-e-shauq sust-e-gaam ho kyuun
qadam baDhaae hue haan qadam baDhaae hue

vo khvaab hi sahi pesh-e-nazar to ab bhi hai
bichhaDne vaalaa sharik-e-safar to ab bhi hai