duniyaa tere naam se mujh ko pahchaane — Ram Awtar Gupta Muztar

navaazaa hai mujhe patthar se jis ne
use main phuul de kar dekhtaa huun

shaam-e-avadh ne zulf mein gundhe nahin hain phuul
tere baghair subh-e-banaras udaas hai

teraa honaa na maan kar goyaa
tujh ko taslim kar rahaa huun main

dil kaa sukun rizq ke hangaame khaa gae
sukh aadmi kaa chand nivaalon ne Das liyaa

lamha lamha bikhar rahaa huun main
apni takmil kar rahaa huun main

rah-e-qaraar ajab raah-e-be-qaraari hai
ruke hue hain musaafir safar bhi jaari hai

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

rustam hai gar jo 'ishq mein bin karr-o-far ke aa
tahmina-e-butaan ke yahaan be sipar ke aa

zamaane se mohabbat kaa abhi tak
ye haasil hai ki kuchh haasil nahin hai

haan kabhi khvaab-e-ishq dekhaa thaa
ab tak aankhon se khuun Tapaktaa hai