aabaad karein baada-kash allaah kaa ghar aaj — Riyaz Khairabadi

mai-khaane mein mazaar hamaaraa agar banaa
duniyaa yahi kahegi ki jannat mein ghar banaa

aap aae to khayaal-e-dil-e-naashaad aayaa
aap ne yaad dilaayaa to mujhe yaad aayaa

ghurur bhi jo karun main to aajizi ho jaae
khudi mein lutf vo aae ki be-khudi ho jaae

ham jaante hain lutf-e-taqaazaa-e-mai-farosh
vo naqd mein kahaan jo mazaa hai udhaar mein

baDe paak tinat baDe saaf baatin
'riyaaz' aap ko kuchh hamin jaante hain

aisi hi intizaar mein lazzat agar na ho
to do ghaDi firaaq mein apni basar na ho

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

khushbu-e-hinaa kahnaa narmi-e-sabaa kahnaa
jo zakhm mile tum ko phulon ki qabaa kahnaa

ye mai-kada hai yahaan hain gunaah jaam-ba-dast
vo madrasa hai vo masjid vahaan milegaa savaab

ik tajassus huaa kartaa hai bure kaam se qabl
ek pachhtaavaa bure kaam ke anjaam ke baad

ek aavaaz ne toDi hai khamoshi meri
DhunDhtaa huun to pas-e-saahil-e-shab kuchh bhi nahin