bahut Dartaa thaa rone se — Shahnawaz Farooqi

kitaab-e-ishq mein saae kaa matlab
dar-o-divaar kaa saaya nahin hai

kabhi ye gham thaa ki samjhaa nahin koi ham ko
aur ab ye Dar ki kisi ne samajh liyaa hi na ho

judaai se ziyaada jaan-levaa
mohabbat mein mohabbat ki kami hai

husn aisaa thaa ki har ik aainaa kam paD gayaa
aaina kyaa umr bhar kaa dekhnaa kam paD gayaa

ye jahaan ek tamaashaa hai sabhi kahte hain
tum na hote to ise ham bhi tamaashaa kahte

dard thaa haijaan thaa par aankh mein aansu na the
jaise dil tak aate aate haadisa kam paD gayaa

commission par commission khaa rahe hain desh ke leader
vo bandar-baanT sarkaari jo pahle thi so ab bhi hai

isi khanDar mein mire khvaab ki gali bhi thi
gali mein peD bhi thaa peD par samar bhi thaa

aasmaan aisaa bhi kyaa khatra thaa dil ki aag se
itni baarish ek shole ko bujhaane ke liye

us imaarat ko giraa do jo nazar aati hai
mire andar jo khanDar hai use taamir karo

ham aur chaah ghair ki allaah se Daro
milte hain tum se bhi to tumhaari khushi se ham

saaqi-e-gulfaam ne rakkhi to hai bhar kar sharaab
Dar hai uD jaae na shishe se pari ban kar sharaab