zahe-nasib ki duniyaa ne tere gham ne mujhe — Shakeel Badayuni

meraa azm itnaa buland hai ki paraae sholon kaa Dar nahin
mujhe khauf aatish-e-gul se hai ye kahin chaman ko jalaa na de

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

kaafi hai mire dil ki tasalli ko yahi baat
aap aa na sake aap kaa paighaam to aayaa

kal raat zindagi se mulaaqaat ho gai
lab thartharaa rahe the magar baat ho gai

lamhe udaas udaas fazaaein ghuTi ghuTi
duniyaa agar yahi hai to duniyaa se bach ke chal

shaguftagi-e-dil-e-kaarvaan ko kyaa samjhe
vo ik nigaah jo uljhi hui bahaar mein hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

bhige bhige sannaaTon mein khoyaa khoyaa saa ik khvaab
sahmi sahmi khaamoshi mein khauf-zada saa tanhaa thaa

ghairon pe khul na jaae kahin raaz dekhnaa
meri taraf bhi ghamza-e-ghammaaz dekhnaa

soz-e-gham se ashk kaa ek ek qatra jal gayaa
aag paani mein lagi aisi ki dariyaa jal gayaa