khayaal-o-khvaab ko naam-o-nasab ko achchhaa ho — Shehpar Rasool

dusron ke zakhm bun kar oDhnaa aasaan nahin
sab qabaaein hech hain meri ridaa ke saamne

mujhe bhi lamha-e-hijrat ne kar diyaa taqsim
nigaah ghar ki taraf hai qadam safar ki taraf

main ne bhi dekhne ki had kar di
vo bhi tasvir se nikal aayaa

koi saaya na koi ham-saaya
aab-o-daana ye kis jagah laayaa

rekhta kaa ik nayaa majzub hai 'shahpar' rasul
shohrat us ke naam par ik nang hai bohtaan hai

'shahpar' miri hadon kaa taayyun kare koi
aankhon se bah rahun ki ragon mein phiraa karun

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

dilon ke dard jagaa khvaahishon ke khvaab sajaa
balaa-kashaan-e-nazar ke liye saraab sajaa

ek hi khvaab ne saari raat jagaayaa hai
main ne har karvaT sone ki koshish ki