ishq bin jiine ke aadaab nahin aate hain — Wali Aasi

dosto DhunD ke ham saa koi pyaasaa laao
ham to aansu bhi jo piite hain to paani ki tarah

dariyaa dikhaai detaa hai har ek reg-zaar
shaayad ki in dinon mujhe shiddat ki pyaas hai

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

musallaa rakhte hain sahbaa-o-jaam rakhte hain
faqir sab ke liye intizaam rakhte hain

sameT bikhre hue kaaghzaat ko apne
koi sadaa tujhe vaapas bulaane vaali hai

main jis kaa javaab na de paaun
aisaa bhi koi savaal karnaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

baad-e-tark-e-ulfat bhi yuun to ham jiye lekin
vaqt be-tarah biitaa umr be-sabab guzri

tiri javaan umangon ko ho gayaa hai kyaa
Dari Dari si mohabbat mujhe pasand nahin

rumuz-e-ishq ki gahraaiyaan salaamat hain
hamaare khvaab-e-pareshaan kisi ko kyaa maalum

baDi viraani hai dil ke shajar par
mohabbat ke parinde uD gae kyaa