dil ko daar-us-surur kahte hain — Zaheer Dehlvi

bujhaaun kyaa charaagh-e-subh-gaahi
mire ghar shaam honi hai sahar se

chaahat kaa jab mazaa hai ki vo bhi hon be-qaraar
donon taraf ho aag baraabar lagi hui

shirkat gunaah mein bhi rahe kuchh savaab ki
tauba ke saath toDiye botal sharaab ki

kuchh to hote hain mohabbat mein junun ke aasaar
aur kuchh log bhi divaana banaa dete hain

samjheinge na aghyaar ko aghyaar kahaan tak
kab tak vo mohabbat ko mohabbat na kaheinge

ishq kyaa shai hai husn hai kyaa chiiz
kuchh idhar ki hai kuchh udhar ki aag

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

toD kar kaabe ko masjid na banaao zaahid
khaana-barbaad kisi dil hi mein kar ghar paidaa

sunaa haal-e-dil-e-'majruh' shab ko
koi hasrat si hasrat thi bayaan mein

pechidgi-e-taba ki ye saaf hai dalil
maani ulajh ke rah gae un ke kalaam mein

aah qaasid to ab talak na phiraa
dil dhaDaktaa hai kyaa huaa hogaa