barson se khaDaa huun haath uThaae — Zuhoor Nazar

baad-e-tark-e-ulfat bhi yuun to ham jiye lekin
vaqt be-tarah biitaa umr be-sabab guzri

ghar se us kaa bhi nikalnaa ho gayaa aakhir muhaal
meri rusvaai se shohrat ku-ba-ku us ki bhi thi

vo jise saare zamaane ne kahaa meraa raqib
main ne us ko ham-safar jaanaa ki tu us ki bhi thi

na so sakaa huun na shab jaag kar gizaari hai
ajiib din hain sukun hai na be-qaraari hai

sunte hain chamaktaa hai vo chaand ab bhi sar-e-baam
hasrat hai ki bas ek nazar dekh lein ham bhi

vo bhi shaayad ro paDe viraan kaaghaz dekh kar
main ne us ko aakhiri khat mein likhaa kuchh bhi nahin

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

barseingi aaj rahmatein aamad hai yaar ki
naayaab hain ye ghaDiyaan tire intizaar ki

dil lutf-e-intizaar kaa ummid-vaar thaa
vo dastyaab ho gayaa taakhir ke baghair

thaa intizaar manaaeinge mil ke divaali
na tum hi lauT ke aae na vaqt-e-shaam huaa

hai intizaar mujhe jang khatm hone kaa
lahu ki qaid se baahar koi bulaataa hai