Ghazal

"bichhaD ke tujh se kisi dusre pe marnaa hai ye tajraba bhi isi zindagi mein karnaa hai havaa darakhton se kahti hai dukh ke lahje mein abhi mujhe kai sahraaon se guzarnaa hai main manzaron ke ghane-pan se khauf khaataa huun fanaa ko dast-e-mohabbat yahaan bhi dharnaa hai talaash-e-rizq mein dariyaa ke panchhiyon ki tarah tamaam umr mujhe Dubnaa ubharnaa hai udaasiyon ke khad-o-khaal se jo vaaqif ho ik aise shakhs ko aksar talaash karnaa hai"

"vo ek naam jo dariyaa bhi hai kinaaraa bhi rahaa hai us se bahut raabta hamaaraa bhi chaman vahi ki jahaan par labon ke phuul khilein badan vahi ki jahaan raat ho gavaaraa bhi hamein bhi lamha-e-rukhsat se haul aataa hai judaa huaa hai koi mehrbaan hamaaraa bhi alaamat-e-shajar-e-saaya-daar bhi vo jism kharaabi-e-dil-o-dida kaa istiaara bhi ufuq thakan ki ridaa mein lipaTtaa jaataa hai so ham bhi chup hain aur is shaam kaa sitaaraa bhi"

"jalva-saamaan rukh-e-jaanaan na huaa thaa so huaa zarra zarra mah-e-taabaan na huaa thaa so huaa kuchh to pahle se hi afsurda the ahl-e-gulshan kuchh ye gham khun-e-bahaaraan na huaa thaa so huaa main ne dekhaa hai tiri kam-nigahi kaa anjaam aashnaa-e-gham-e-dauraan na huaa thaa so huaa ye inaayat ye tiraa jud-o-karam hai ki mujhe shikva-e-tangi-e-daamaan na huaa thaa so huaa allaah allaah mai-o-minaa kaa asar bhi kyaa hai kuchh ilaaj-e-gham-e-dauraan na huaa thaa so huaa ye tire sher tiraa husn-e-taghazzul 'asad' tire sheron se jo shaadaan na huaa thaa so huaa"

"shoala-e-tanhaai se sab baam-o-dar jal jaaeinge chand din ki baat hai buDhe khanDar jal jaaeinge ek din is dasht par suraj kaa dil aa jaaegaa ek din is dasht ke saare shajar jal jaaeinge jaaegaa azm-e-safar manzil pe tanhaa dosto raah ki garmi se sab ahl-e-safar jal jaaeinge sun rahaa huun jald hi barseinge sang-e-aaftaab aur mere shahr mein jitne hain ghar jal jaaeinge khaak rah jaaegi ik muTThi haqiqat ki faqat saare afsaane tavil-o-mukhtasar jal jaaeinge mujh ko kyon detaa hai tu unchi uDaanon ki sazaa dhuup kaa mausam hai zaalim mere par jal jaaeinge aag har lamha taaaqub kar rahi hai aap kaa aap 'asad' laakh rahiye baa-khabar jal jaaeinge"

"mire shajar tujhe mausam nayaa banaate rahein gulaab-e-sabr tiri Tahniyon pe aate rahein jo doston ki kamaanon ko tiir detaa hai hamein ye zarf bhi bakhshe ki zakhm khaate rahein bas ik charaagh hai apni mata-e-besh-bahaa so shaam aati rahe ham use jalaate rahein sahar ke rang darichon ko sair karte jaaein havaa ke jhonke khule aanganon mein aate rahein kabhi kabhi koi suraj tulu hotaa rahe ridaa-e-abr mein taare bhi munh chhupaate rahein fasil-e-shahr-e-anaa rafta rafta girti jaae ye zalzale miri jaan mein hamesha aate rahein"

"ishq mein hijr ke sadme bhi uThaae nahin hain apni marzi se to ham dasht mein aae nahin hain apnaa kaasa bhi tahi apnaa kadu bhi khaali daagh-e-didaar-o-havas dil pe lagaae nahin hain ham se maayus na ho sham-e-shabistaan-e-khayaal ham abhi khaak ke siine mein samaae nahin hain ab kisi samt se khushbu nahin aati ham tak kaaghzi phuul bhi taaqon mein sajaae nahin hain ik dukaan khol ke baazaar kaa rukh dekhnaa hai abhi aaiin tijaarat ke banaae nahin hain hurmat-e-harf ki tafsir banaane vaalo ham kisi aur sitaare se to aae nahin hain"

"suraj ki tarah qariya-e-mahtaab mein aayaa raat ek ajab shakhs mire khvaab mein aayaa kyaa lahr thi jo mujh ko lagaa aai kinaare kis mauj se phir halqa-e-girdaab mein aayaa ye shahr to sahraaon ki sarhad pe basaa thaa kaise ye kharaaba kaf-e-sailaab mein aayaa ik yaad se raushan hue divaar-o-dar-o-baam kham ek nai tarah kaa mehraab mein aayaa pahle to dhanak-rang mein Duubaa ufuq-e-jaan phir manzar-e-hijraan bhi tab-o-taab mein aayaa ik shakhs ki yaktaa thaa darida-dahni mein zikr us kaa magar pyaar se ahbaab mein aayaa"

"jo aks-e-yaar tah-e-aab dekh sakte hain ajiib log hain kyaa khvaab dekh sakte hain samundaron ke safar sab ki qismaton mein kahaan so ham kinaare se girdaab dekh sakte hain guzarne vaale jahaazon se rasm o raah nahin bas un ke aks sar-e-aab dekh sakte hain havaa ke apne ilaaqe havas ke apne maqaam ye kab kisi ko zafar-yaab dekh sakte hain khafaa hain aashiq o maashuq se magar kuchh log ghazal mein ishq ke aadaab dekh sakte hain"

"dil-e-vahshi tujhe ik baar phir zanjir karnaa hai ki ab is se mulaaqaaton mein kuchh taakhir karnaa hai mire pichhle bahaane us pe raushan hote jaate hain so ab mujh ko nayaa hiila nai tadbir karnaa hai kamaan-daaron ko is se kyaa gharaz pahunche ki rah jaae unhein to bas ishaare par ravaana tiir karnaa hai abhi imkaan ke safhe bahut khaali hain duniyaa mein mujhe bhi ek nauha jaa-ba-jaa tahrir karnaa hai"

"ham apne hijr mein apne visaal mein gum hain vo sochtaa hai ki us ke khayaal mein gum hain har ek lamha-e-lazzat hisaab maangtaa hai so ham bhi sab ki tarah ik savaal mein gum hain shafaq ki aankh kise ro rahi hai muddat se dyaar-o-dasht sabhi kis malaal mein gum hain ruton ke daaere kyuun aaj tak salaamat hain tamaam silsile kyuun maah-o-saal mein gum hain ye chaand jhiil ke paani se ham-kalaam hai kyuun kinaare kis liye ranj-o-malaal mein gum hain"

"shab-e-siyaah se jo istifaada karte hain vahi charaaghon kaa maatam ziyaada karte hain dilon kaa dard kahaan jaam mein utartaa hai harif-e-vaqt ko ham gharq-e-baada karte hain puraani talkhiyaan daaman bahut pakaDti hain kabhi nayaa jo koi ham iraada karte hain paDi thi dil ki zamin jaane kab se be-masraf ab us mein yaadon ke but istaada karte hain ajiib daur hai ye jis mein saare daanish-var dilon ko tang makaan ko kushaada karte hain ye aasmaan-e-vatan kyuun ridaa hamaari hai ham is zamin ko kaise labaada karte hain"

"mausam-e-hijr to daaim hai na rukhsat hogaa ek hi lamhe ko ho vasl ghanimat hogaa meraa dil aakhiri taare ki tarah hai goyaa Dubnaa us kaa nae din ki bashaarat hogaa ab ke hangaama nai tarah huaa hai aaghaaz shahr bhi ab ke nae taur se ghaarat hogaa shaakh se TuuT ke patte ne ye dil mein sochaa kaun is tarah bhalaa maail-e-hijrat hogaa dil se duniyaa kaa jo rishta hai ajab rishta hai ham jo TuuTe hain to kab shahr salaamat hogaa baadbaanon se havaa lag ke gale roti hai ye safina bhi kisi mauj ki qismat hogaa"

"siyaah raat se ham raushni banaate hain puraani baat ko aksar nai banaate hain kal ek bachche ne ham se kahaa banaao ghar so ham ne kah diyaa Thahro abhi banaate hain ham ek aur hi manzar ki taak mein hain miyaan ye dhup-chhaanv ke naqshe sabhi banaate hain musavviraan-e-fanaa apne canvas pe kabhi na koi shahr na koi gali banaate hain ham us dayaar mein zinda hain jis ke saare log kabhi fatila kabhi lablabi banaate hain"

"khushi bhi ab saraapaa gham lage hai tavajjoh aap ki kuchh kam lage hai koi hamdam nahin duniyaa mein lekin jise dekho vahi hamdam lage hai main huun majbur apne dil se mujh ko paraayaa gham bhi apnaa gham lage hai bahaarein hain chaman mein gul ba-daamaan khizaan kaa saa magar mausam lage hai jidhar dekho udhar shabnam ke aansu chaman kyaa hai saf-e-maatam lage hai har ik majbur se kah do ye 'asad' har ik maghrur kaa sar kham lage hai"

"safar bhi koi na ho rahguzar bhi koi na ho hamaare baad kharaab is qadar bhi koi na ho sab us hujum mein gum honaa chaahte hain jahaan pataa-Thikaana bhi khair-o-khabar bhi koi na ho khudaa vo din na dikhaae ki in dayaaron mein sab aankhein rakhte huun aur dida-var bhi koi na ho zamaana kaash na aae ki phuul phal ke baghair faqat gharon kaa ho jangal shajar bhi koi na ho zamin na bain kare mehrbaan maan ki tarah karo kuchh aisaa kisi kaa zarar bhi koi na ho phir us jahaan mein kaise rahein kahaan jaaein vatan bhi koi na ho aur ghar bhi koi na ho hamein zamin pe utaaraa gayaa zavaal ke vaqt yahi bajaa hai to phir nauhagar bhi koi na ho"

"dilon par khauf bhi taari bahut hai magar jangon ki tayyaari bahut hai khirad ki bastiyon ke phunkne ko junun ki ek chingaari bahut hai sabhi zad mein hain dasht-o-koh-o-insaan ye zarb-e-vaqt hai kaari bahut hai puraanaa khushk pattaa kah rahaa thaa havaa mein tez-raftaari bahut hai ham apne dil ki duniyaa dekhte hain hamein ye shaghl-e-bekaari bahut hai chale ho us se milne par ye sun lo use shauq-e-dil-aazaari bahut hai nahin hai saath rahnaa garche aasaan bichhaDne mein bhi dushvaari bahut hai"

"dil-o-nazar ko lahu mein Dubonaa aataa hai na ab hansi hamein aae na ronaa aataa hai havaa ke haath charaaghon se khelte hain yunhi ki haath bachchon ke jaise khilaunaa aataa hai ham ahl-e-zar ke daron par qadam nahin rakhte gadaa-e-khaak hain miTTi pe sonaa aataa hai khumaar-e-dar-ba-dri chain se na rahne de jo khvaab aataa hai aksar salonaa aataa hai ghazal ke sher hain mufrad magar vo shaair hai jise sab ek laDi mein pironaa aataa hai"

"kis ne koi sach likhaa hai ye faqat ilzaam hai shaairi mahrumiyon kaa khubsurat naam hai be-gharaz milne ki saari mantiqein jhuTi hain yaar tu jo aayaa hai to ab batlaa bhi de kyaa kaam hai ab ke maikhaane ki miTTi par koi dhabba nahin rind hain TuuTe hue haathon mein saabit jaam hai ne shikoh-e-sarvari hai ne jamaal-e-dilbari dil kisi firaun-e-be-saamaan kaa ahraam hai"

"puraane ghar se nikal kar nae makaan ki samt bahut se log gae ik 'ajab jahaan ki samt pukaartaa hai jo sadiyon se ham ko ai yaaro chalo chale chalein us TuuTe saaebaan ki samt jo ek 'umr se rahtaa thaa barf-zaaron mein chalaa hai kis liye jalti hui chaTaan ki samt milaa thaa raah mein baiThaa jo ek din ham ko sunaa hai jaa chukaa vo shakhs aasmaan ki samt miraa jahaaz jo pahunchegaa us jazire mein na koi ghaur se dekhegaa baadbaan ki samt kabhi jo sochaa hai haq baat kah duun ai 'asad' baDhi hain qainchiyaan kitni miri zabaan ki samt"

"har ik yaqin ko ham ne gumaan banaa diyaa hai the jis zamin pe use aasmaan banaa diyaa hai ham aise khaana-kharaabon se aur kyaa bantaa kisi se silsila-e-rabt-e-jaan banaa diyaa hai hamaare sher hamaare khayaal kuchh yuun hain khalaa mein jaise kisi ne makaan banaa diyaa hai mohabbaton ke aminon ki hain vo aavaazein ki jin ko khalq ne shor-e-sagaan banaa diyaa hai zamin to puuri tarah ham bhi dekh sakte hain falak ko is ne magar be-karaan banaa diyaa hai"

"sach bol ke bachne ki rivaayat nahin koi aur mujh ko shahaadat ki zarurat nahin koi main rizq ki aavaaz pe labbaik kahungaa haan mujh ko zaminon se mohabbat nahin koi mere bhi kai khvaab the mere bhi kai azm haalaat se inkaar ki surat nahin koi main jis ke liye saare zamaane se khafaa thaa ab yuun hai ki us naam se nisbat nahin koi lahja hai miraa talkh mire vaar hain bharpur lekin mere siine mein kudurat nahin koi"

"meri nafrat bhi hai sheron mein mire pyaar ke saath main ne likkhi hai ghazal jurat-e-izhaar ke saath eqtidaar ek taraf ek taraf darveshi donon chizein nahin rah sakti hain fankaar ke saath ik khalaa dil mein bahut din se makin hai ab to yaad guzraa huaa mausam bhi nahin yaar ke saath baadbaanon se ulajhti hai havaa roz magar kashtiyaan soi hain kis shaan se patvaar ke saath shahr mein jahl ki arzaani hai lekin ab tak main hi samjhauta nahin kartaa huun meaar ke saath mere ashaar hain naaqid ke liye kuchh bhi nahin dard ko main nahin likhtaa kabhi dushvaar ke saath"

"jise na meri udaasi kaa kuchh khayaal aayaa main us ke husn pe ik roz khaak Daal aayaa ye ishq khuub rahaa baavajud milne ke na darmiyaan kabhi lamha-e-visaal aayaa ishaara karne lage hain bhanvar ke haath hamein khoshaa ki phir dil-dariyaa mein ishtiaal aayaa muravvaton ke samar daaghdaar hone lage mohabbaton ke shajar tujh pe kyaa zavaal aayaa hasin shakl ko dekhaa khudaa ko yaad kiyaa kisi gunaah kaa dil mein kahaan khayaal aayaa khudaa bachaae tasavvuf-gazida logon se koi jo sher bhalaa sun liyaa to haal aayaa"

"jis ko honaa hai vo in aankhon se ojhal ho jaae us se pahle ki miraa kaam mukammal ho jaae main to bas dekhtaa rahtaa huun zaminon ke kaTaao aadmi sochne vaalaa ho to paagal ho jaae kahin aisaa na ho viraane hon phir se aabaad kahin aisaa na ho har shahr hi jangal ho jaae ye zamin jis pe hai gulzaaron ki taadaad bahut ye bhi ho saktaa hai kal ko vahi maqtal ho jaae reg-zaaron se bukhaaraat hi uThte hain magar kaun jaane ki ye garmi koi baadal ho jaae meraa pindaar hi divaar hai naakaami ki ye jo gir jaae to har khvaab mukammal ho jaae"