dil lagaane ko saaraa jahaan thaa magar — Ahmar Nadeem

ye kaisi fasaahat ki samajh mein nahin aati
tahrir-e-mohabbat zaraa aasaan likhaa kar

kitne hi raaz sab par 'ayaan ho gae
ik tiraa raaz-e-ulfat chhupaate hue

maut bar-haq hai jab aa jaae hamein kyaa lekin
zindagi ham tiri raftaar se Dar jaate hain

qaafile mein har ik fard mukhtaar hai
qaafila dekh lenaa luTegaa zarur

chupke chupke apne andar jaate hain
sahme sahme baahar aanaa paDtaa hai

kitne rishton kaa main ne bharam rakh liyaa
ik ta'alluq se daaman chhuDaate hue

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tiri yaad mein thi vo be-khudi ki na fikr-e-naama-bari rahi
miri vo nigaarish-e-shauq bhi kahin taaq hi pe dhari rahi

dil ko honaa hai fanaa rahnaa hai qaaem aql ko
hasti-e-aadam kahaan jaae ye fitrat chhoD kar

ye hai khulaasa-e-ilm-e-qalandari ki hayaat
khadang-e-jasta hai lekin kamaan se duur nahin

kyaa tujhe ilm nahin teri razaa ki khaatir
main ne kis kis ko zamaane mein khafaa rakkhaa hai