ye kaisi fasaahat ki samajh mein nahin aati — Ahmar Nadeem

kitne hi raaz sab par 'ayaan ho gae
ik tiraa raaz-e-ulfat chhupaate hue

dil lagaane ko saaraa jahaan thaa magar
sochtaa kaun hai dil lagaate hue

maut bar-haq hai jab aa jaae hamein kyaa lekin
zindagi ham tiri raftaar se Dar jaate hain

qaafile mein har ik fard mukhtaar hai
qaafila dekh lenaa luTegaa zarur

chupke chupke apne andar jaate hain
sahme sahme baahar aanaa paDtaa hai

kitne rishton kaa main ne bharam rakh liyaa
ik ta'alluq se daaman chhuDaate hue

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

sabhi se jab mohabbat chaahte ho
mohabbat kyon nahin karte sabhi se

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

husn jalva dikhaa gayaa apnaa
ishq baiThaa rahaa udaas kahin