ayaan the jazba-e-dil aur bayaan the saare khayaal — Aleena Itrat

dil ke gulshan mein tire pyaar ki khushbu paa kar
rang rukhsaar pe phulon se khilaa karte hain

husn-o-jamaal-o-zist ki aaraaishein fuzul
ishq-o-junun ki aag jo dil mein javaan na ho

lo hamaaraa javaab le jaao
ye mahaktaa gulaab le jaao

Thiik hai jaao ta'alluq na rakheinge ham bhi
tum bhi vaada karo ab yaad nahin aaoge

jin ke mazbut iraade bane pahchaan un ki
manzilein aap hi ho jaati hain aasaan un ki

khvaahishein khvaab dikhaati hain tire milne kaa
khvaab se kah de ki taabir ki surat aae

haqiqatein to aTal hain badal nahin saktin
magar kisi ki tasalli se hausla huaa hai

nai manzil kaa junun tohmat-e-gumraahi hai
paa-shikasta bhi tiri raah mein kahlaayaa huun

hausla hai to safinon ke alam lahraao
bahte dariyaa to chaleinge isi raftaar ke saath

aaine par koi tohmat na dharo
khaal-o-khad apne sanvaaro saahab

naahaq ham majburon par ye tohmat hai mukhtaari ki
chaahte hain so aap karein hain ham ko abas badnaam kiyaa

aalam aalam ishq-o-junun hai duniyaa duniyaa tohmat hai
dariyaa dariyaa rotaa huun main sahraa sahraa vahshat hai