nai manzil kaa junun tohmat-e-gumraahi hai — Farigh Bukhari

kitne shikve gile hain pahle hi
raah mein faasle hain pahle hi

jitne the tere mahke hue aanchalon ke rang
sab titliyon ne aur dhanak ne uDaa liye

safar mein koi kisi ke liye Thahartaa nahin
na muD ke dekhaa kabhi saahilon ko dariyaa ne

pukaaraa jab mujhe tanhaai ne to yaad aayaa
ki apne saath bahut mukhtasar rahaa huun main

do dariyaa bhi jab aapas mein milte hain
donon apni apni pyaas bujhaate hain

jalte mausam mein koi faarigh nazar aataa nahin
Dubtaa jaataa hai har ik peD apni chhaanv mein

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

mujh se kahaa jibril-e-junun ne ye bhi vahi-e-ilaahi hai
mazhab to bas mazhab-e-dil hai baaqi sab gumraahi hai

ab aa gae ho to Thahro kharaaba-e-dil mein
ye vo jagah hai jahaan zindagi sanvarti hai

umr guzri ik nigaah-e-lutf ki ummid mein
ham ko apne hauslon ki ye adaa achchhi lagi