yahaan gharib ko sab kuchh to de diyaa us ne — Annu Rizvi

apne haathon se zahr mat diije
ye kahin zindagi na ban jaae

main to niklaa thaa charaaghon ko jalaane ke liye
log kam-zarf the daaman ko bachaa kar bhaage

dariyaa chaDhaa to gaanv ke gaanv bahaa gayaa
utraa to kitne shahr ke naqshe banaa gayaa

kabhi to baaDh aa ke apne saath sab bahaa gai
kabhi kisaan baarishon ki raah dekhtaa rahaa

us ko ye dil bhuul sakegaa mushkil lagtaa hai
mushkil se to jaa ke kisi se ye dil lagtaa hai

hamaare us ke darmiyaan ye kaisaa faasla rahaa
use bhi sab khabar rahi hamein bhi sab pataa rahaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi