aaj bhi 'prem' ke aur 'krishn' ke afsaane hain — Ata Abidi

zarurat Dhal gai rishte mein varna
yahaan koi kisi kaa apnaa kab hai

kisi ke jism-o-jaan chhalni kisi ke baal-o-par TuuTe
jali shaakhon pe yuun laTke kabutar dekh aayaa huun

sab khvaab puraane hain har chand fasaane hain
ham roz basaate hain aankhon mein nai duniyaa

koi bhi khush nahin hai is khabar se
ki duniyaa jald lauTegi safar se

khvaab hi khvaab ki taabir huaa to jaanaa
zindagi kyuun kisi aankhon ke asar mein aai

adab hi zindagi mein jab na aayaa
adab mein itni mehnat kis liye hai

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

kin manzilon luTe hain mohabbat ke qaafile
insaan zamin pe aaj gharib-ul-vatan saa hai