tum se ab kyaa kahein vo chiiz hai daagh-e-gham-e-ishq — Dattatriya Kaifi

rahne de zikr-e-kham-e-zulf-e-musalsal ko nadim
us ke to dhyaan se bhi hotaa hai dil ko uljhaao

jo chashm-e-dil-rubaa ke vasf mein ashaar likhtaa huun
to har har lafz par ahl-e-nazar ik saad karte hain

dam ghanimat hai saaliko meraa
jaras-e-daur ki sadaa huun main

ye chalan hain to tumhein hashr se deinge tashbih
log saffaak kaheinge baDi rusvaai hai

baadbaanon mein bhari hai is ke kyaa baad-e-nafas
kashti-e-umr-e-ravaan ko taab langar ki nahin

vafaa par daghaa sulh mein dushmani hai
bhalaai kaa hargiz zamaana nahin hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

zahe-nasib ki duniyaa ne tere gham ne mujhe
masarraton kaa talabgaar kar ke chhoD diyaa

gham to ho had se sivaa aur ashk-afshaani na ho
us se puchho jis kaa ghar jaltaa ho aur paani na ho

raat aakhir hai yahaan aayaa nazar aasaar-e-subh
shama ki phiki hai lau honTon ki hai laali hai udaas