ye tamaashaa didani Thahraa magar dekhegaa kaun — Faza Ibn E Faizi

vaqt ne kis aag mein itnaa jalaayaa hai mujhe
jis qadar raushan thaa main us se sivaa raushan huaa

har ik qayaas haqiqat se dur-tar niklaa
kitaab kaa na koi dars mo'tabar niklaa

kisi lamhe to khud se laa-taalluq bhi raho logo
masaail kam nahin phir zindagi bhar sochte rahnaa

khaak-e-'shibli' se khamir apnaa bhi uTThaa hai 'fazaa'
naam urdu kaa huaa hai isi ghar se unchaa

shab-gazida ko tire is ki khabar hi kab thi
din jo aaegaa gham-e-laa-mutanaahi degaa

palkon par apni kaun mujhe ab sajaaegaa
main huun vo rang jo tire paikar se kaT gayaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa