tark-e-taalluqaat khud apnaa qusur thaa — Gopal Mittal

fitrat mein aadmi ki hai mubham saa ek khauf
us khauf kaa kisi ne khudaa naam rakh diyaa

mujhe zindagi ki duaa dene vaale
hansi aa rahi hai tiri saadgi par

kyaa kijiye kashish hai kuchh aisi gunaah mein
main varna yuun fareb mein aataa bahaar ke

meraa saaqi hai baDaa dariyaa-dil
phir bhi pyaasaa huun ki sahraa huun main

khudaa gavaah ki donon hain dushman-e-parvaaz
gham-e-qafas ho ki raahat ho aashiyaane ki

ab shikva-e-sang-o-khisht kaisaa
jab teri gali mein aa gayaa huun

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge