haar hi jiit hai aain-e-vafaa ki ru se — Imran

kyaa jaane shaakh-e-vaqt se kis vaqt gir paDun
maanind-e-barg-e-zard abhi Doltaa huun main

apne lahu mein zahr bhi khud gholtaa huun main
soz-e-darun kisi pe nahin kholtaa huun main

vaqt har zakhm ko bhar detaa hai kuchh bhi kiije
yaad rah jaati hai halki si chubhan ki had tak

rang ho raushni ho yaa khushbu
sab mein partav usi hasin ke hain

khvaab, ummid, tamannaaein, taalluq, rishte
jaan le lete hain aakhir ye sahaare saare

ajiib khauf kaa mausam hai in dinon 'imrran'
sugandh le ke havaa duur tak nahin jaati

uD gai yuun vafaa zamaane se
kabhi goyaa kisi mein thi hi nahin

mujh ko na dil pasand na vo bevafaa pasand
donon hain khud-gharaz mujhe donon hain naa-pasand

ham gardish-e-girdaab-e-alam se nahin Darte
tufaan hai agar aaj kinaara bhi to hogaa

nau-giraftaar-e-mohabbat huun vafaa mujh mein kahaan
kam se kam dil abhi sau baar to aane diije

dil vo kaafir hai ki mujh ko na diyaa chiin kabhi
bevafaa tu bhi use le ke pashemaan hogaa

ham dil se rahe tez havaaon ke mukhaalif
jab tham gayaa tufaan to qadam ghar se nikaalaa