rang ho raushni ho yaa khushbu — Imran

kyaa jaane shaakh-e-vaqt se kis vaqt gir paDun
maanind-e-barg-e-zard abhi Doltaa huun main

apne lahu mein zahr bhi khud gholtaa huun main
soz-e-darun kisi pe nahin kholtaa huun main

haar hi jiit hai aain-e-vafaa ki ru se
ye vo baazi hai jahaan jiit ke haare saare

vaqt har zakhm ko bhar detaa hai kuchh bhi kiije
yaad rah jaati hai halki si chubhan ki had tak

khvaab, ummid, tamannaaein, taalluq, rishte
jaan le lete hain aakhir ye sahaare saare

ajiib khauf kaa mausam hai in dinon 'imrran'
sugandh le ke havaa duur tak nahin jaati

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

ek din vo zarron ko aaftaab kar leinge
dhuup ke jo khvaahaan hain raat ke andhere mein

ik bosa maangtaa huun main khairaat-e-husn ki
do maal ki zakaat ki daulat ziyaada ho

vo ik lamha jo tere qurb ki khushbu se hai raushan
ab is lamhe ko paaband-e-salaasil chaahtaa huun main