main agar khud ko maar Daalun to — Khalid Nadeem Shaani

tum in lakiron mein ik khushi bhi talaash kar lo to moajiza hai
ki main to bachpan se jaantaa huun miri hatheli kaa naam dukh hai

hazrat-e-josh ke divaan kaa jab zikr chale
kitni hasrat se hamein urdu zabaan dekhti hai

hami vo ilm ke raushan charaagh hain jin ko
havaa bujhaati nahin hai salaam karti hai

jis tarah aap ne bimaar se rukhsat li hai
saaf lagtaa hai janaaze mein nahin aaeinge

kahaan se aai thi aakhir tiri talab mujh mein
khudaa ne mujh ko banaayaa to main akelaa thaa

dard ki chaah mein pahle to kuredun shab-bhar
phir usi zakhm ko siine kaa mazaa letaa huun

ret par ik nishaan hai shaayad
ye hamaaraa makaan hai shaayad

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

pyaaso raho na dasht mein baarish ke muntazir
maaro zamin pe paanv ki paani nikal paDe

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai