har ek ahd ne likkhaa hai apnaa naama-e-shauq — Khurshid Talab

havaa to hai hi mukhaalif mujhe Daraataa hai kyaa
havaa se puchh ke koi diye jalaataa hai kyaa

koi charaag jalaataa nahin saliqe se
magar sabhi ko shikaayat havaa se hoti hai

roz divaar mein chun detaa huun main apni anaa
roz vo toD ke divaar nikal aati hai

hamein har vaqt ye ehsaas daaman-gir rahtaa hai
paDe hain Dher saare kaam aur mohlat zaraa si hai

miri mushkil miri mushkil nahin hai
vasila teri aasaani kaa main huun

havaa se kah do ki kuchh der ko Thahar jaae
khajil hamaari ibaarat havaa se hoti hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

mere dard mein ye khalish kahaan mere soz mein ye tapish kahaan
kisi aur hi ki pukaar hai miri zindagi ki sadaa nahin

nikalte hain baraabar ashk meri donon aankhon se
mataa-e-dard tulne ki taraazu ho to aisi ho

pichhle safar mein jo kuchh biitaa biit gayaa yaaro lekin
aglaa safar jab bhi tum karnaa dekho tanhaa mat karnaa