taskin de sakeinge na jaam-o-subu mujhe — Mahesh Chandra Naqsh

yuun guzarte hain hijr ke lamhe
jaise vo baat karte jaate hain

kis tarah karein tujh se gila tere sitam kaa
madhosh ishaaron ne bhi dil toD diyaa hai

tasvir-e-zindagi mein nayaa rang bhar gae
vo haadse jo dil pe hamaare guzar gae

is Dubte suraj se to ummid hi kyaa thi
hans hans ke sitaaron ne bhi dil toD diyaa hai

aghyaar kaa shikva nahin is ahd-e-havas mein
ik umr ke yaaron ne bhi dil toD diyaa hai

kaun samjhe ham pe kyaa guzri hai 'naqsh'
dil laraz uThtaa hai zikr-e-shaam se

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

aaghaaz-e-mohabbat kaa anjaam bas itnaa hai
jab dil mein tamannaa thi ab dil hi tamannaa hai

masarrat zindagi kaa dusraa naam
masarrat ki tamannaa mustaqil gham

honTon ko roz ik nae dariyaa ki aarzu
le jaaegi ye pyaas ki aavaargi kahaan

meri ye aarzu hai vaqt-e-marg
us ki aavaaz kaan mein aave