yaqinan rahbar-e-manzil kahin par raastaa bhulaa — Nisar Itavi

ye dil vaalon se puchho is ko dil vaale samajhte hain
bigaaD aai havaa zulfein kisi ki yaa sanvaar aai

kitne pur-haul andheron se guzar kar ai dost
ham tire husn ki rakhshanda sahar tak pahunche

aa dost saath aa dar-e-maazi se maang laaein
vo apni zindagi ki javaan bhi hasin bhi thi

dil mein kyaa kyaa gumaan guzarte hain
muskuraao na baat se pahle

afsos kisi se miT na saki insaan ke dil ki tishna-labi
shabnam hai ki royaa karti hai baadal hain ki barsaa karte hain

subh bichhaD kar shaam kaa vaada shaam kaa honaa sahal nahin
un ki tamannaa phir kar lenaa subh ko pahle shaam karo

gham hai na ab khushi hai na ummid hai na yaas
sab se najaat paae zamaane guzar gae

uThaa hi laayaa sabhi raaste vo kaandhon par
yaqin us pe na kartaa to main kidhar jaataa

nahin nahin main bahut khush rahaa huun tere baghair
yaqin kar ki ye haalat abhi abhi hui hai

main kisi haal mein maayus nahin ho saktaa
zulmatein laakh hon ummid-e-sahar rakhtaa huun

jab bhi us divaar se miltaa huun ro paDtaa huun main
kuchh na kuchh to hai yaqinan us mein patthar se alag

un se maayus-e-iltifaat nahin
go ba-zaahir tavaqquaat nahin