ye taaj ke saae mein zar-o-sim ke khirman — Parvez Shahidi

miri zindagi ki zinat hui aafat-o-balaa se
main vo zulf-e-kham-ba-kham huun jo sanvar gai havaa se

na jaane kah gae kyaa aap muskuraane mein
hai dil ko naaz ki jaan aa gai fasaane mein

giit hariyaali ke gaaeinge sisakte hue khet
mehnat ab ghaarat-e-jaagir tak aa pahunchi hai

abhi se subh-e-gulshan raqs-farmaa hai nigaahon mein
abhi puuri naqaab ulTi nahin hai shaam-e-sahraa ne

yaad hain aap ke toDe hue paimaan ham ko
kijiye aur na sharminda-e-ehsaan ham ko

guzraa hai kaun phuul khilaataa khiraam se
'shaadaab' aaj raahguzar paa rahaa huun main

jo haqiqat se khauf khaane lage
khvaab aise main dekhtaa hi nahin

udhar sharm haail idhar khauf maane
na vo dekhte hain na ham dekhte hain

aasaan nahin dariyaa-e-mohabbat se guzarnaa
yaan nuuh ki kashti ko bhi tufaan kaa Dar hai

khud ko main bhalaa zer-e-zamin kaise dabaataa
jitne bhi khanDar nikle vo aabaad se nikle

ik tez raad jaisi sadaa har makaan mein
logon ko un ke ghar mein Daraa denaa chaahiye

dilon se khauf nikaltaa nahin azaabon kaa
zamin ne oDh liye sar par aasmaan phir se