mohabbat mein jiinaa nai baat hai — Saail Dehlvi

aah kartaa huun to aate hain pasine un ko
naala kartaa huun to raaton ko vo Dar jaate hain

khat-e-shauq ko paDh ke qaasid se bole
ye hai kaun divaana khat likhne vaalaa

tumhein parvaa na ho mujh ko to jins-e-dil ki parvaa hai
kahaan DhunDun kahaan pheinki kahaan dekhun kahaan rakh di

janaab-e-shaikh mai-khaane mein baiThe hain barahna-sar
ab un se kaun puchhe aap ne pagDi kahaan rakh di

hain e'tibaar se kitne gire hue dekhaa
isi zamaane mein qisse isi zamaane ke

ye masjid hai ye mai-khaana taajjub is par aataa hai
janaab-e-shaikh kaa naqsh-e-qadam yuun bhi hai aur yuun bhi

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ai chaaragaro paas tumhaare na milegi
bimaar-e-mohabbat ki davaa aur hi kuchh hai

tu jo talvaar se nahlaae lahu mein mujh ko
ghusl-e-sehhat huaa bhi ishq ki bimaari se

ishq binaai baDhaa detaa hai
jaane kyaa kyaa nazar aataa hai mujhe

tamaam din ki mashaqqat-bhari takaan ke baad
tamaam raat mohabbat se phir jagaaun use